Umunyabigwi mu muziki Manu Dibango yishwe na COVID-19

Umuhanzi wo muri Cameroon Emmanuel N’Djoke Dibango [Manu Dibango] wamamaye cyane mu gucuranga Saxophone yitabye Imana azize indwara ya COVID-19.

Manu Dibango wabaga mu Bufaransa yitabye Imana kuri uyu wa 24 Werurwe 2020 nk’uko byatangajwe biciye ku rukuta rwe rwa Facebook.

“N’akababaro kenshi turatangaza urupfu rwa Manu Dibango  watabarutse kuri uyu wa 24 Werurwe 2020 afite imyaka 86 nyuma y’uburwayi bwa COVID-19”

Abo mu muryango we batangaje ko imihango yo kumushyingura igomba kuva vuba kandi igakorwa na bo ubwabo.

Tariki 18 Werurwe 2020 nibwo uyu musaza yatangaje ko yanduye  indwara ya COVID-19. Icyo gihe yahumurije abakunzi be avuga  ko yumva ari  kugenda yoroherwa.

Abamukurikiranaga bavuze ko mbere y’uko afatwa na COVID-19 yari yajyanywe mu bindi bitaro kubera iyindi ndwara.

Urugendo rwa muzika rwa Manu Dibango rwatangiye mu 1950 ubwo yakoreraga mu Bufaransa no mu Bubiligi.

Mu 1960 yagiye kuba muri Congo aho yaririmbaga mu itsinda ryitwaga African Jazz ryari riyobowe na Joseph Kabasele.

Imwe mu ndirimbo zamenyekanye cyane za Manu Dibango ni iyitwa Soul Makossa yakoze mu 1972 bivugwa ko ari yo yakomotseho Wanna Be Startin’ Somethin’ ya Micheal Jackson iri kuri alubumu ye yitwa Thriller mu 1982.

Manu Dibango yitabye Imana nyuma y’iminsi undi munyabigwi wo muri Congo Brazaville,  Aurlus Mabélé, aguye i Paris mu Bufaransa kubera COVID-19.

httpss://youtu.be/EF92yOsv3Y8